X
تبلیغات
رایتل
1386/12/07

 

مطلب زیر یکی از ده ها موردی است که از سوی برخی افراد به ظاهر آذربایجانچی به گروه های اینترنتی  ارسال گردیده است. کمیته مردمی دفاع از غرب آذربایجان مطلب مورد نظر را  بدون سانسور جهت مطالعه فعالین حرکت ملی در وبلاگ کمیته قرار می دهد، تا شاید افکارعمومی ملت آذربایجان در مورد آنها به قضاوت بنشیند.

 

کمیته مردمی دفاع از غرب آذربایجان

 

 

 

 

کورد سورونو، گئرچک یا اویدورما

 

مراد علیزاده

qayali_daghlar@ yahoo.com

 

گونئی آذربایجان میللی حرکتینین گوندم سورونلاریندان بیری کورد سورونودور. بو سورونلا یاناشماقدا میللی حرکتین چئشیتلی قروپلارینین سیاستیندن آسیلی اولمایاراق ، دئمک اولار کی سون ایللرده ان چوخ دئییلن مساله کورد مساله سیدیر. کورد سورونونون چؤزولمه سینین زامانی و نئجه اولماسیندان اؤنجه بو سورونون گوندمده اولماسینین سبب لرین آراشدیرماق اؤنملی دیر. بو دوشونجه یه وارمامیزین چئشیتلی سبب لری وار، آنجاق ان باشلیجا سببی بو سورونون نورمال دیشی قابارماسی دیر. نییه کی میللی حرکت ده چالیشان بوتون تشکیلات لار استثناسیز بو سورونو قاباردیرلار.

کوردلرین میلی سیاسی تشکیلاتلاری ایللردیر موباریزه ائدریر ، اونلار ایللردیر کی بؤیوک کوردوستان آرزوسونو داشییرلار. بؤیوک کوردوستان خریطه سینده تورک تورپاقلارینین اؤنملی یئرلری ایللردیر یئرلشدیریلیب. آنجاق بو گونه قدر بیربئله حساسیت یارانمامیش. بو گونه قدر کورد مساله سی گوندمه گلمه میش. نه اولموش کی بو مساله میللی حرکت ده بیردن بو قدر اؤزونه یئر آچمیشدیر؟

تاریخی آچیدان کورد میللتچیلیی ایله آذربایجان میللتچیلییی قارشیلاشمامیش. البته کیملیک باخیمیندان بیزیم میللت اؤزلرین کوردلردن آییرمیشلار. اونلاری باشقا میللت و یا باشقا مذهب و دین دن اولدوقلاری اوچون اوز ایچلرینه آلمامیشلار. آرا –سیرا کورد طایفالاری ایله یارانان سورون ایسه اونلارین میللتچیلیی ایله باغلانمامیش. بو سورونلار آذربایجانین اوز ایچینده ده اولموشدور.

سیمیتقو اولایینی کورد میللتچیلیینه باغلاماق اولماز. اونا گؤره کی همین دؤنمده ، رحیم خان چلبیانلی کیمی لرده سیمیتقونون گؤردویو ایشلری یاپیرمیشلار.

کوردلرین مدنی ، سیاسی و حربی حرکت لری ایران آدلانان اولکه ده ایکینجی دونیا ساواشی سونراسی باشلامیش.  قاضی محمد باشچیلیغی ایله یارانان کورد موختار جمهوریتی ایله آذربایجان دموکرات فرقه سینین آراسیندا چوخ مثبت موناسیبت لر اولموش.

او ایللردن بری کورد لرله ، داها دوغروسو کورد میللتچی لییی ایله گونئی آذربایجاندا تورک میللت چیلییی آراسیندا گرگین لیک و ساواش اولمامیشدیر.

سولدوز حادثه سی دئییلن اولایدا ایسه کوردلرله تورکلری بیر-بیرینه قارشی قویان، ایرانین کوردوستان جبهه سی باشچیسی  مصطفی چمران اولموشدور. مصطفی چمران ملا حسنی ایله بیرلیکده ، کوردلرین حرکتین خنثی ائله مک اوچون کورد-تورک ساواشینا یئر آچمیشدیلار. بونون آچیق فاکت لاری وار؛ ایندی کوتله آراسیندا کیمدن سوروشسانیز بئله بیر جوابلا قارشیلاشماق اولار: " کوردلر عادی سربازلاری و ارتش آداملارین یوخ، پاسدارلاری اؤلدوروردولر"، عادی گؤرولی عسگری و تورک عسگرلرینی اؤلدورمه ین کورد چریک لری، عادی میللتی نئجه اؤلدوره بیلر. البته اولابیلر بارماق سایی دا انسان، کورد چریکلری طرفیندن اؤلدورولسون. بودا چوخ دوغال دیر. پیشه وری حرکتینده عادی گؤره ولی لر بیلمه دن ، شخصی حیسلرینه قاپیلاراق، عادی جماعته قارشی مثبت داورانمامیشدیلار.

کوردلرین ایندیکی پارتیالارینا گلدیکده ، اونلارین خریطه لرین سند اولاراق اورتایا قویساق ، همین سوچ بیزی ده توتار. بیزیم ده بوتؤو آذربایجان خریطه سینده ، کنگر کؤرفه زینه قدر خریطه میز اوزانیب. بیر حالدا کی همین اراضی ده آذربایجانلیلار یا چوخ آزدیلار ، یا تام آسیمیله اولوبلار.

یعنی ائرمنی لردن فرقلی اولاراق بیزیم کوردلرله تاریخی قان تؤکمه میز اولماییب.

البته بونو دانماق اولماز کی کوردلرله بیزیم بیر سیرا تورپاقلاریمیز اوزرینده عئینی ادعامیز وار. بیز دئییریک سویوق بولاق بیزیم دیر ، اونلار دئییر اورمو بیزیم دیر.

بو ادعالار گلجک ده آرامیزدا چاتیشمایا سبب اولابیلر. آنجاق ایندی سویوق بولاق نه اونلاریندی نه بیزیم. اورمو نه اونلاریندیر نه بیزیم. الیمیزده اولمایان تورپاقلار اوستونده اصیل استعمارچی ایله یوخ ، بیر-بیریمیزله ساواشماغیمیزدا سورغو یئری وار.

نییه کورد و  تورکلر آراسیندا ایندیدن ، اورتاق دوشمن اولا- اولا بو قدر دوشمن لیک حیسلری یارانیر؟  نییه کورد و تورک تشکیلاتلاری اؤزلرین سیاست چی بیلسه لرده سیاسی اویونون اصیل یؤنلده نین کیم اولدوغون بیلمیرلر؟

هر بیر آیدین تورک و یا کورده بللی دیر کی بو گون آذربایجان و کوردوستان تورپاقلاری فارس شوونیزمینین اسارتینده دیر. کوردلرین بو اسارته قارشی موباریزه لرین ، فارس شوونیزمی تورکلرین الیله باسدیرمیشدیر. اونا گؤره کی غربی آذربایجاندا و کوردوستاندا ، سپاهدا پاسدار اولانلارین چوخونلوغونو تورکلر تشکیل ائدیب.  بلکه دییه جکسیز او دؤنمده همین پاسدارلاردا میللی شعور یوخودور. اسلاما و یا هانسی بیر توزاغا آلدانمیشلار. بس ایندی نه دئیه بیلریک؟

بو گون "کمیته دفاع از غرب آذربایجان" آدلی بیر سیرا دوستلاریمیز کوردلره قارشی موحاربه اعلان ائدیر.  بو کمیته الی سیلاحلی بؤیوک بیر اوردویا ساواش اعلان ائدیر. حؤرمتلی گوناذ تی وی " کوردلرین قویروغوندان یاپیشیب سولیمانییه یه قدر توللاریق" دئییر. بیر حالدا کی بو ادعانی سورن کمیته یا تلوزیون بیر گئجه لیک کوردلرین یاشادیغی شرایطه دوشمه یه قاتلانانمازلار.  سایین قارداشیمیز حؤرمتلی احمد اوبالی نین الینه سیلاح وئریب یوللاماق اولارمی پ. کا کا و پژاکین ساواشینا؟ اصلا و ابدا.

فارس شوونیزمی یوزلر و مینلر آذربایجان فعالینی توتوقلاییب،اما بیر نمونه یوخدور کی دییه لر فیلان میللتچی نی اونا گؤره توتوبلار کی  کوردلره قارشی مقاله یازیب،‌بیلدیریش یاییب و یا سیلاح قالدیریب!

حاکمیت له همیشه جیجی باجی اوینایان "آذربایجانلی بیلی یوردلار توپلومو" قورومون ،‌بیر زامان ان چوخ چالیشدیغی قونو "کورد مساله سی" ایدیر. اونلارلا حاکمیتین نئجه یاناشماسی هامیمیزا بللی دیر. ایندییه دک اونلارین هانسین بونا گؤره توتوبلار کی، سن اولکه ده قومی ساواش سالیرسان؟ هئچ بیرین!!

هر بیر منطقی اینسان چوخ راحتجا آنلایا بیلر کی بو اویون فارس شوونیزمینین اویونودور.

انتظامی،‌سپاه و اطلاعات مامورلارینین کورد موباریزلری طرفیندن اؤلدورولنلرین ، شهید آدلاندیرماغین نه معناسی وار؟ همین قووه لر دئییلمی بیزیم حرکتی باسدیریر؟ همین اطلاعات مامورلاری دئییل کی تبریزده، اورمودا،‌خییودا، سولدوزدا تورک میللتچیسینه قارشی سیلاح چکیر؟ میللتچینی توتوقلاییر؟ اونلار تورکدولر دئییب ساوونوروقسا چوخ مایماغیق!!

بس اطلاعات سلوللاریندا میللتچیلری دیندیرن، ایشکنجه ائدن تورک دئییلمی؟ شخصیم ایندیه دک بیر فارس بازجو گؤرمه میشم. هامیسی تورک اولوب.

اوزون سؤزون قیساسی؛ کورد مساله سینی آغیزلارا ساققیز ائدیب چئینیینلر بیلمه لیدیرلر کی بو گون بیزیم ان بؤیوک دوشمنیمیز فارس شوونیزمی دیر و اونون ان بؤیوک دستکچیسی جمهوری اسلامی ایران دیر. بیز ان بؤیوک دوشمنیمیزله هئچ کسه قارشی ، بیر سنگرده دورماغا حاققیمیز یوخدور.

کوردلره قارشی حرکت ائتمه یی میللت چیلیییه باغلایانلار ایسه بیلمه لیدیرلر کی یالنیز اؤزلرین آلدادیرلار.

میللی قورتولوشوموز اوچون اصیل دوشمنله قول –بویون اولوب ، گلجکده محتمل دوشمنه قارشی موباریزه آپارماق هئچ بیر موباریزه منطقینه سیغمیر. بونو بوتون میللی تشکیلاتلار بیلمه لیدیر.

مود (mod ) اولاراق کورده قارشی بیانات وئرمه یی آرامیزدان گؤتورمه لیی ییک. دیشاریدا اولان ادعالیلاردا یاخشی اولار گلیب سپاه و یا انتظامی قوه لرینه عضو اولوب پژاکا قارشی موباریزه ائتسینلر!! بئله ده هم دونیا و هم آخرت لرینی آلارلار!!!