آذربایجان میللی هرکاتی بؤیوک-کیچیک بوتون ایمکانلاردان یارارلاناراق بوتون ساهه لرده ایره لیله مگی باجارمالیدیر. بیز موتشککیل اولماغا جان آتارکن، حرکتیمیزی گوجلندیره رک اؤزوموزون مودافیعه سیستمینی یاراتماقلا هوجوم پلانینی حاضیرلاماقدا بوتون فورصتلری دوزگون دیرلندیرمه لیگیک.

باتی آذربایجان، اؤزللیکله اورمو و سولدوزدا سئچگیلرده ایشتیراک ائدیب، تورک اصیللی بیر نومایندنین سئچیلمه سینده کی فایدالاری گئچن یازیلاریمدا درینلیگینه آراشدیردیغیم اوچون آرتیق واختینیزی آلماق ایستمیرم، قیساجا ایشاره ائتمکله یئته نیرم.

سئچگیلرده ایشتیراک ائده رک تورکلرین قازانماسی ایله!

۱- کورد دسته لری نین یالانچی ایدعالاری نین اوستو آچیلاجاق. بو یالانچی تبلیغاتا اینانانلار ایستر اؤز میلتیمیزدن ایسترسه ده باشقالاری گرچکلری گؤروب اونا گؤره فیکیر یوروده جکلر.

۲- بئینالخالق هوقوق عالمینده اؤزللیکله گله جکده ماسا باشینداکی موزاکیره لرده میلتیمیزین ایستیفاده سی اوچون سندلره بیریده ائکلنه جک.

۳- او بؤلگه ده یاشییان میلتیمیزین روح یوکسکلیگینه سبب اولاراق کورد شووینیستلری نین پلانلی شکیلده اورمو و اطرافینا تبلیقاتچی گؤندره رک میلتیمیزی قورخودوب قاچیرتماغا چالشدیغی سییاستی چورویه جک.

۴- میللی حرکتچیلریمیزین بو آغیر و پولیسی اورتامدا بیر آرایا گلمه لری اوچون موناسیب اورتام یاراداجاق.

۵- میللی هرکاتیمیزی مودافیعه ائدن ویا اونا نیسبی یاخین اولان اورگانلاری و یوکسک سوییه لی شخصییتلری داهادا اورکلندیره جک.

۶- بیرلیکده موقاویمت فیکری نین گوجونو آرتیراجاق.

۷- ترافدا یاشییان و کورد دسته لری نین تبلیقاتینا ایناناراق بؤیوک بیر فاجیعه یه دوغرو سوروکلنن بعضی صمیمی کوردلره اویانیش قامچیسی ووراجاق.

۸- یالانچی تبلیقاتلا بؤلگه ده میلتلر آراسیندا کین و نیفرت یارادان دوشونجه نین تاثیرینی آزالداجاق.

۹- یاخینلاشان فاجیعه نین قارشیسیندا بیر مانیه تؤرده رک اینسانلارین قانی نین تؤکولمه سی نین اؤنلنمه سینده رول اوینویاجاق.

۱۰- و …

بو بؤلگه ده سئچگیلرده ایشتیراکا چاغیرماغین، آذربایجانی پارچالامق معناسینا گلمه دیگینی، تام ترسینه تاریخی تورپاقلاریمیزا گؤز تیکنلرین پارچالاما چابالاری نین قارشیسینی آلماق اوچون درین معنالی و اؤلچولو بیر سییاست اولدوغونو وورقولاماقدا فایدا گؤرورم. عومومییتله گونئی آذربایجانین بوتون بؤلگه لرینده بو سئچگیلرده ایشتیراک ائدیب- ائتمه مه باره ده عزیز دوستوم در. سمد بی نیکنام و سایین ماشاللاه بی رزمی نین فیکیرلرینیه بؤیوک اؤلچوده قاتیلماقلا بیرلیکده آزبیلتوپ -اون سون بیانییه سینه دیقت چکیرم. چونکی، گونئیده کی فاللاریمیزین ذهنییتدن اوزاق، گرچکلره دایاناراق و عئینی حالدا بیر تک یول سئچه رک قرار وئریب تبلیقات آپارمالارینی داها اویگون گؤردویومو بیلدیرمیشدیم.

داخیلده اؤن سنگرده ساواشان میللی موباریزلریمیز، بوتون بونلاری نظرده آلاراق باتی آذربایجاندا اؤزللیکله اورمودا بوتون گوجلرینی سفربر ائده رک مومکون قدر موتشککیل اولاراق سئچگیلرده ایشتیراک ائتمه لیدیرلر. آتالار دئمیشکن ” دوه دن بیر قیل دا چکسن قنیمتدیر ” بو دورومدان ایستیفاده ائدیب، اینزیوادان چیخاراق تهرروک ائتمک، میللی تفککورلولریمیزین آدایلیغینا ایجازه وئرمزلرسه کی وئرمییه جکلر، بیزه یاخین اولنلارا یاردیم ائتمک، تورک میلت وکیللرینی مجلیسه گؤندرمک میللی هرکاتیمیزین و گله جگیمیز اوچون ان دوشونجه لی سییاستدیر.بای بک

خاریجده اوتوروب، تورک سؤزوندن دیسکیننلر، اؤزو قاییرما رهبرلیک یوخوسو گؤره رک بونا – اونا داش آتماق اوچون نظرییه وئرنلرین بولاشیق سؤزلری، سیزلری چکیندیرممه لیدیر، قوللاریزی داها دا یوخاری چیرمالاماغا شیرنیکدیرمه لیدیر.

اورمودا کورد مسئله سینه گلدیکده ایسه، اورمودان، ایسمایل آغا سیمیتقونون جینایتلریندن، بیرینجی - ایکینجی دونیا موحاریبه لرینده کی کورد تالانلاری و سویقیریملارینیندان معلوماتی اولمویانلارین، ایسلام اینقیلابیندا اورمو دا باشوئرنلردن خبرسیز اولانلار ویا او زامانکی ایرتیجای تفککورله کورد دسته لری ایله بیرلیکده سولدوزا هوجوم ائدنلرین غئیری علمی و بزنده غرضلی تهلیللری بیر داها بو مثله یه قاییتماغی بوینوما یوکله دی. بو تهلیللرین بعضیلری اینسان سئورلیک دونو ایله بزنمیشسه ده، میلتیمیزه روا گؤروله جک ان بؤیوک غئیری اینسانی هوجوملاری یا گؤرمور یادا گؤرمه مزلیکدن گلیر.

بوگونکو دورومدا باتی آذربایجانداکی وضعییتی تهلیل اوچون درین معلومات، تاریخ بیلگیسی، میللی تفککور، بؤلگه و دونیا سییاستینی اولدوغو کیمی آنلاماغین واجیبلیگی اینکار ائدیلمزدیر. بیزیم، کورد ویا باشقا میللئتلرله دوشمنچیلیگیمیزین اولمادیغنی، آنجاق تورپاق و میلتیمیزه هوجوملار قارشیسیندا اؤزوموزو مودافیعه ائتمک مجبورییتینده قالدیغیمیزی بیلنلر یاخشی بیلیرلرکی، اونلارین بیزیمله پروبله می وار، تورپاغیمیزدا گؤزو وار.

هر هانسی بیر چوروموش ایدئولوگییه صاحیب اولانلار، شخصی موناسیبتلری میللی منافعیدن اوستون توتانلار، علمی و بیلگی یئتنگی اولمویانلارین، اورموداکی دورومو تهلیلده آپاردیقلاری غئیری سیاسی وئ غئیری میللی فیکیر ویا تهریفلر میلتیمیز طرفیندن باغیشلانمازدیر. شوبهه یوخدور کی، تاریخیمیزی دوزگون ترزیده اؤلچمه قابیلییتینده اولمویانلار، ماننا دؤولتی نین ماهییتینی بیلمیینلر و اونا صاحیب چیخماق ایسته ینلری تانیمییانلار، تاریخی سلاجیقه نی اوخومویانلار، عوثمانلی تاریخینی ورقلمیینلر، اوستاد مهممد تمددون- ائلی دئهقان – کاوه بایات- اورمو خانی مهممد قولی خان افشار – موتمدولووزرانین خاطیره لری و اونلارجا بئله اثرلری اوخومویانلاردان دوزگون آنالیز گؤزله مک اولماز. آنجاق ملون کسروی نین ” آذربایجانین ۲۰ ایللیک تاریخینی ” چوخلاری نین اوخودوغونا دا شوبهه ائدیلمز. او حادیثه لری دیرلندیریرکن باخیش آچیسینی کسروی زاوییه سینه توشلویانلار ویا میللی مفکوره یئرینه هله ده طبقاتی تهلیللرله یاناشانلار، دایاز سودا بوغولان اوشاق کیمی ایمکلییه رک میلتی قالانمیش تونقالا ساری الی یالین سوروکله مکده دیرلر. بیر زامانلار روسقولو، شاهقولو ویا ایمامقولولوقلا مشقول اولانلارین اورکدن میلتین قوینونا سیغینمییانلاری اؤزلرینی بؤیوک سییاستچی سایسالار دا هله ده او آنتی تورکلرین آلیشدیردیغی تهلیل مئتود اؤلچولرینده اؤزلرینی آلداتماقدادیرلار.بای بک

بیزلرین خطاسی میلتیمیزین بوگونو و گله جگینه بؤیوک تهلوکه لر تؤرده جگینه شوبهه ائدیله مز. عوثمانلی ایمپیراتورلوغونون، گونئی آندولو و دییار بکیری، آذربایجانلی آققویونلو تورکلریندن بوشالداراق یئرینه باشقا میلتلری یئرلشدیرمه سی نین سببی نه اولورسا – اولسون بوگون اؤز تؤرمه لری خوسران و عذابینی چکمکده دیر. رحمتلیک سئیید جفر پیشوری نین سویوق بولاق خطاسی نین یانیندا زنجانی ایتیرمه سی و یا آذربایجانین تاریخی تورپاقلاری ( قزوین – همدان- سونگور- ساوه - اراک…) ایددئاسیزلیغی نتیجه سینده بؤیوک گوجه دؤنوشمه مه سی بیزی بوگونه گتیریب چیخارمیشدیر. آنا دیلی اوستونده دیرلی جاوانلاریمیز زیندانلاردا، ائشیکده کی لر ایسه اولمازین تهقیرلره معروض قالماقدادیر. باشقاسینا یوخ، آنجاق میلتیمیزه گوونمه لی، میلتیمیزی آیاغا قالدیرمالی، گوجلو و اَییلمیین بیر قول اولاراق باشقا میلتلرله دیپلوماتیک علاقه لر یاراتمالی و موزاکیره ماساسی آرخاسیندا اوتورمالیییق.

اورمو ایله باغلی سون گونلر رادیو- تئلئویزیونلاردا موصاحیبه لری، قروپ و سیته لرده یازیلاری، پالتالک اوتاقلاریندا موزاکیره لری و سایره هر کس گؤروب و موختلیف گؤروشلری ائشیتمکده دیر. بو تهلیللرین بیر بؤلومونون میللی هرکاتیمیزا اویگون بیر بؤلومونون ایسه تهلوکه لی اولدوغو آشیکاردیر. تسسوفله بو تهلوکه لی دیرلندیرمه لرین بعضیسی صمیمییتینه و دئموکراتیک دوشونجه سینه ایناندیغیمیز چوره لردن گلدیگینه گؤره تهلوکه ایکی قات آرتیر. چونکی بو تهلیللره میلتین بیر بؤلومو ایناناراق موقاویمت و دیره نیش تفککورو یئرینه سؤزده سییاست، عملده تسلیمچیلیک پرئنسیپینی گودور. بو هاقدا ایکی مثله یه توخوناراق سؤزلریمه سون وئریرم.

۱- تأسوفله و اوتاناراق دئمه لییمکی گوجلو بیر تشکیلاتیمیزین اولمادیغینا گؤره بوگون سیستئماتیک موقاویمت ایمکانیمیز یوخدور. باتی آذربایجاندا هر آن گؤزله نیلمز بیر حادیثه نین باش وئربیله جگی ایسه بیزی گؤزله مز. خالقیمیزین تاریخ بویو اولدوغو کیمی بو گونده اؤزونو قوروماق اوچون سیلاهینی یاستیغی نین آلتینا قویماسی اونون گوون قایناغیدیر.

بونو باشقا یئره یورانلار خطا ایچینده دیرلر.

۲- بوتون ساواش و موباریزه لرین سونو موزاکیره ایله بیتدیگینه شوبهه یوخدور. آنجاق کورد دسته لری نین باتی آذربایجان حاقینداکی ایددئالاری، خریته لری، تبلیقات و تهریکاتی کسیلمه دیکجه آذربایجانین هر هانسی بیر شخص – قوروم و قورولوشونون اونلارلا موزاکیره یه گیرمه سی اویدورما سییاستدیر. قیلینجینی قینیندا گیزلده رک اوزانان دوستلوق الی گؤرونموین دوشمن قدر تهلوکه لی، آلداتیجی و یالانچیدیر. اؤزوموزو سییاستچی سایاراق بو اویونلارا گلمگیمیز ده باغیشلانمازدیر. بیز آنجاق بوتون کورد دسته لری نین تبلیقات ماشی نین بو موتجاویز چاغیریشلارینا سون قویمالاری ایله اونلارلا بیر ماسا باشیندا اوتورماغی دوشونمه لیگیک.

۲۰۰۸/۰۲/۱۲