سولدوز هفته سی
بؤیوک رسول اوغلو
کؤچوره ن: اؤیرنجی امکداشلاری
آذربایجان میللی حرکاتی بؤیودوکجه اینانیلماز باشاریلارا قول چکمکده دیر. گونئی آذربایجاندا دیرلی گنجلریمیزین "سولدوز هفته سی" اعلان ائتمه سی ایله آرتیق تاریخیمیزی اؤزوموز یازماغا باشلامیشیق آنلامی اورتایا چیخمیشدیر. بو ضرورتی دویان و مظلوم آما مغرور میلتیمیزین حاقینی- حوقوقونو قورویان بو میللی تفککورلو گنجلریمیزه عشق اولسون.
بؤلگه ده باش وئرمیش حادیثه لری اؤزللیکله گئچن یوز ایلده باشیمیزا گتیریلن موصیبتلری زامانیندا و دوزگون فیکیر دایره سینده یازیب میلتیمیزه تقدیم ائتسیدیک، بلکه ده بو قدر اودوزمازدیق. بیرینجی دونیا موحاریبه سی عرفه سینده اورمو و اطرافینداکی قیرقینلاری، تورکلوک شعوروندان پای آلمییان علی دهقانلار، محمد تمدونلر، معتمدول ووزرا و کسروی لر قلمه آلماسایدی، بلکه ده تورک میلتی نین قانی باتمیش اولاجاقدی. آنجاق بوگون آذربایجان تورک میلتی، اؤزللیکله فداکار جاوانلاریمیزین یییلندیگی میللی شعور تاریخیمیزین دوزگون یازیلماسی نین موشدولوقچوسودور. تام حقیقتلری عکس ائتدیره بیله جک اؤز قلمیمیزدن آخان گرچک تاریخیمیز میلتیمیزین گئچمیشیندن گله جگه ایشیق توتاجاق بیر آیدینلیق چیراغی اولاجاغیندا شوبهه ائدیله مز. یالانچی تبلیغاتین سییاستده ووردوغو ضربه قدر یالانچی تاریخینده میلتین وارلیغینا ووردوغو ضربه اینکار ائدیلمزدیر. بونون ان باریز نومونه سی ایسه فارس شووینیزمی نین گئچن یوز ایلده تاریخی تحریف ائده رک اؤزونه قازاندیغی اویدورما کیملیگی گؤسترمک یئرینده بیر اؤلچو دیریدیر. یوز ایل بوتون ایمکانلاردان ایستیفاده ائده رک، میلتیمیزی اویدوروب یوخویا وئرن بو تبلیقاتچیلارین توخودوغو تور، گئچن 15- 20 ایلده هئچ بیر ماددی ایمکانا مالیک اولمویان ساده جه اینام و عقیده ایله یولا چیخان سئچگینلریمیزین نظرییه لری ایله ییرتیلدی. اؤزونو توپارلاما ایمکانی اولمادیغینا گؤره ده قیلینجینی قینیندان چیخاراق ناهاق اولدوغونو دونیایا گؤستردی.
اونون اوچوندور کی، آشیری و دوشورو دویغولارا قاپیلمادان حادیثه لرین دریندن آراشدیریلماسی و اؤزللیکله جانلی شاهیدلرین معلوماتی بؤیوک اؤنم داشیماقدادیر. سویو بولاندیریب بالیق توتماق ایسته ینلر ایسه اؤز موداخیله لری ایله میلتی چاش- باش سالماغا چالیشابیلرلر. حتّی ساپی اؤزوموزدن اولان بالتالارلا حقیقتلری اینکار ائتمه یه چابا گؤستریله جگیده دوشونولمکده دیر. گوونلی قایناقلارا ایستینادن گوونلی کوتلوی اینفورماسیون واسیطه لری، سیته، رادیو- تو و یزیچیلاریمیزین بوینونا بؤیوک گؤرو دوشمکده دیر.
ایسلام اینقیلابیندان سونرا دینیمیزین عدالت پرئنسیپلرینه اعتیقادلا بیرلیکده، ایسلامدا سییاهی هئبئشی ایله سئییدی قورئیشی نین آراسیندا هئچ بیر فرق یوخدور فیکری ایله آذربایجندا اینکیشاف پروژه لری یرینه یئتیرمک اوچون بؤلگه یه چوخلو سفرلریم اوموشدو. بو سفرلرین بیرینده کوردوستان دئموکرات پارتییاسی نین اورمویا و اؤزللیکله اورمو قیشلاسینا هوجومونون شاهیدی اولدوم. میلتین الینده اولان کیچیک چاپلی سیلاهلارلا نئجه موقاویمت گؤستره رک موهاجیملری گئری اوتورتدوقلارینی گؤروب، طرزیلی، سییاووش دیزه سی کیمی کندلرده گیزلنن تئرور دسته لری نین منسوبلارینی یاخالاماغا چالیشان خالقی آلقیشلامیشدیم.
بند خیابانیندا او گؤزل و مودئرن ائولره سوخولموش، قومپاره و باشقا سیلاحلارلا شهره گیرمه یه جهد ائدن بو دسته لرین، او ائولرین چوخونو تخریب ائده رک قاچارکن تالان ائتدیکلرینی یاخیندان گؤرموشدوم.
آما سولدوزدا نه لرین باش وئردیگیندن دوزگون خبریم یوخ ایدی، آنجاق بئینیمین یاریقلاری ذهنییت دریاسیندا بوغولماقدایدی.
دقیق خاطیریمده قالماسادا احتیمالن 1361-جی ایل " کاراب " مهندیس موشاویر شیرکتینه چالیشدیغیم زامان سولدوزون گادار و بالیقچی چایلاری نین پروژه لرینده ایشتیراک ائدیردیم. اوواداکی سو، توپراق و باشقا قایناقلاری آراشدیرماق اوچون آددیم- آددیم گزیب تحقیق ائتملیدیک. محمدیار (تور کندی) داغ اتگیندکی کؤپکلی (کورد کندی) و سولدوز اوچگه نی نین اورتالاریندا اولان اراضیده بیر چوخ تورک کندلری نین ییخیلیب داغیلدیغینی گؤرنده کندلیلردن سوروشدوم.
دئموکرات پارتییاسی و کومله نین هوجوملاریندا بو کندلرین تخریب ائدیلیب تالاندیغنی ائشیدنده قارنا حادیثه سی ایله باغلی تئهراندا اوزدن ایراق انتیرناسیونالیستلرین تبلیقاتلاری خاطیریمه دوشدو.
" تئهرانین نارمک بؤلگه سی نین ائن بؤیوک مسجیدی 7 گؤل منطقه سینه یاخین اولان جومه مسجیددیر. اینقلاب سونراسی او مسجید همیشه دولو اولاردی و اطرافدان گلن خبرلرله بیرگه معلوماتلار یایینلاناردی. مسجیدین حَیَطینه بؤیوک گیریش قاپیسی نین ایکی طرفینده بؤیوک خطلرله 70 - 80 نفرین آدی یازیلمیش و بونلار کورد شهیدلر آدلاندیریلمیشدی. اوستونه بیر اعلامییه یاپیشدیریب، سولدوزلا خانا آراسیندا یئرلشن بو کورد کندینه هوجوم ائدن اورمو خالق قوشونونون کندی یئر ایله بیر ائتدیگی و اینسانلاری قطعله یئتیردیگی یازیلمیشدی " .
بیر گون سولدوزدان قارنایا گئتدیم، بؤیوک، تمیز، گؤزل بیر کند اوتورموشدو داغلارین اتگینده. سولدوزدا گؤردوکلریمین ترسینه بورادا هئچ بیر ییخیق دووار، سینیق سالخاق قاپی، بوش و یا تخریب ائدیلمیش ائو گؤرمه دیکده، سؤزده عدالت اوغروندا موباریزه آپارانلارین یالانچی تبلیقاتلاری نین اینسانلیغا ووران زییانلارینی دوشونوردوم. عدالت نامینه نیفرت کینی سپنلری قارقیشلاییردیم.
سولدوز اوواسیندا تخریب ائدیلمیش ائولره یئنی- یئنی و یاواش- یاواش گلن تورک کندلیلردن ائشیتدیگیم سؤزلر ایسه هله ده اونودولمامیشدیر.
اونلار دئییردیلر " کندلریمیزی او داغ دؤشونده کی کؤپکلی کندیندن قومپارایا توتموشدولار. اونلارلا بیز قونشویوق و ایللر بویو دوز- چؤرک کسمیشدیک، هله هوجومچولار ایچینده چوخلو تورک گنجلرینینده اولماسی لاپ آغلا سیغمییاندیر " .
گئچن هفته "بیزیم سولدوز" نشرییه سی نین قارنا حادیثه سی ایله باغلی یازیسینی اوخودوقدان سونرا امینمکی سویداشلاریمیز حقیقتلری گؤروب، یالانچیلارا آغیز بوزه جکلر. موقاویمت گوجونو داهادا آرتیراراق بؤلگه نین اوتا چکیلمه پلانینی اؤنلویه جکدیر.
تئرور دسته لرینه آلداناراق توپراقلاریمیزدا قان آخیدماغا سوروتلنن قوناقلاریمیز ایسه اؤزلرینی خام بیر خیال اوغروندا قوربان وئرمییه جکدیر.
قایناق:www.oyrenci.com