سئچکی سییاستیمیز، بیر وطن بیر میلت بیر میللی سییاست
صمد نیکنام
سیاسی مؤوقئیه گؤره وطنی پارچالاماق اولماز. آذربایجان بویو سییاست یوروتمگی باجارمایانلار آذربایجانی پارچالاییر و بؤلگه سییاستی یورودور. بو چوخ تهلوکه لیدیر.
ایراندا و گونئی آذربایجاندا سئچکیلرله باغلی فیکیرلرده بیر تهلوکه لی مؤوقع وار. او دا، اورمیه مرکزلی غربی آذربایجاندا، بوتؤولوکده گونئی آذربایجاندان فرقلی سییاست یوروتمکدیر. بو فیکری ایره لی سورنلر سییاست خترینه سؤزده ده اولسا وطنین سیاسی و عئینی زاماندا جوغرافی خریته سینی پارچالاییرلار. بو فیکرین طرفدارلاری نین شهرلریمیزدن جیزدیغی سییاهییا باخاندا آدامی دهشت بورویور. بیر نئچه آذربایجان شهرینی آییریب، تکله میش و کونجه سیخیشدیرمیشلار.
هر شئیدن اؤنجه بئله بیر سوال اورتایا چیخیر : نئجه اولور کی، بیر میلتین بیر بؤلومو هاقدا بیر سییاست و باشقا بیر بؤلومو هاقدا باشقا سییاست یورودولور ؟
بو نئجه میلتدیر کی، اؤلکه نین بو باشیندا یورودولن یارارلی سییاست، اؤلکهنین باشقا بؤلمه سینده یاراسیز اولور ؟
اگر وطنیمیز اوچون کورد تروریزمی دئییلن بیر تهلوکه وارسا، او تهلوکه یه قارشی بوتون میلت بیر مؤوقئدن چیخیش ائتمه لیدیر. میلتین میللی سییاستی، میللی ماراغی و میللی ایراده سی اولمالیدیر.
میللی ایرادنی، میلتی پارچالاماقلا یوخ، بوتؤولشدیرمکله اورتایا قویماق اولار.
بو گون غربی آذربایجانی هر هانسی مئیداندا، میثال اوچون سئچکیلرده تک بوراخانلار صاباح اونو دؤیوش مئیدانیندا دا تک بوراخاجاق.
بو گون شخصی مؤوقئییندن آسیلی اولاراق اردبیلده سئچکییه قاتیلماق ایستمه یهنلر بئله، سولوزدا تهلوکه وار دئیه سئچکیلره قاتیلمالیدیر. یالنیز بو مقاملار میلتی، میلت کیمی فورمالاشدیریر و میللی سییاست یوروتمگی میلته دیکته ائدیر.
نظره آلساق کی، بیر میلتین ایکی میللی سییاستی اولا بیلمز، اوندا غربی آذربایجاندا (ندنیندن آسیلی اولمایاراق) بوتون گونئی آذربایجاندان فرقلی سییاست یورودنلردن سوروشورام : یوروتدویونوز “سییاستین” هانسی میللی سییاستدیر ، سئچکیلره قاتیلماق یوخسا بویکوت ائتمک ؟
سئچکییه قاتیلماق و یاخود قاتیلماماق سیزین اؤز ایشینیزدیر، لاکین سئچکی خترینه اؤز الینیزله وطندن ایکی خریته چکمگین. بو ایشینیزله سؤزده ده اولسا وطنی پارچالاییرسینیز. ائله هر شئی سؤزدن باشلانیر.
قایناق: بای بک